عقدة ذنب

مشاعر : حب ، كره ، خوف ، ألم ، توتر ، شوق ، حنين
، أحاسيس ، فضفضه ، ممكن " كذب " ....
بنفس الوقت :
حكم الظروف ،، حكم قسوة الأيام ،، حكم انكسار ،، حكم عدم القدرة على الكلام ...
مجموعه من الأحاسيس إلي تكون سجينه في القلب ،،
شيء يولد شيء ،،،
حب يولد خوف يولد ألم يولد توتر و شوق و حنين
ألم يولد كره مرات و يتولد من انكسار
خوف يولد كذب في قصص الحب أو قصص الصداقه
كل شيء يؤدي لشئ ..

المشاعر بشكل عام ،،
تحتاج أحد يفهمها بالبداية قبل الحكم و قبل ما تنظلم أو تظلم ،،،
لازم نفهم ،،
الإنسان يمر بظروف
ممكن يكون مكسور ،، ما يقدر يبوح و يقول إلي في قلبه إلي تمزق و تفتت لعده أجزاء ،،
ممكن يكون في قمة حزنه ،، تخنقه عبرته ،، تخونه كلماته ،،،
ممكن أهو يكون عايش في بيئة من الظروف القاسيه إلي بسببها بضطر انه يكذب في بعض الأحيان ،،،
كلنا ندري ،، و نشوف ،، و بعضنا عاش في هالمواقف أو هذي الحياه المؤقته
لأن طبعا الأحوال تتبدل
ممكن فقير بيوم و ليله يصير ملك !!
ممكن إنسان بكامل صحته في ثانيه يموت !!
ممكن أحلام بضغطة زر تتحول لكوابيس !!

انخلقنا بالدنيا و كل شيء معقول انه يصير ،، لا وجود لكلمة " مستحيل " ..
أنولدنا ناس مؤمنين ،، ناس لنا دين ،،
تعلمنا منه أفضل الأخلاق ،، الحب / التسامح / الموده / العدل و غيرها ...
بدون ما أذكرها هي معروفه ،،
وأنولدنا في الدنيا في وسط امتحان ،،
نكون علاقات ،، ( صداقه / حب / زماله ) ~
و الأساس في كل هالعلاقات ،،
الثقة ، العدل ، الإخلاص
ممكن بعضها تنهز ،، ( تنهز الثقه ) / ( يتلاشى الإخلاص ) / ( يموت العدل )
بس لكل سبب مسبب ،،
مافي شيء يوجد من فراغ ..
ما تتملكنا ذيك القناعه إلي تقول أن الإنسان يمر في حياته بظروف
إلي موجود في العين ممكن نقرأه ،، لكن إلي موجود في القلب مستحيل نقرأه و مستحيل نحسه إذا إحنا ما مرينا فيه !!
مثل :
إنسان انت متعود عليه ما يمر يومك بدون ما تكلمه ،، يمر يوم يفقدك !!
هذا وينه ؟ غريبه ما سأل ؟ و يبدي سوء الظن ...
أكيد لاهي مع أحد ثاني ،، أكيد ما أهمه ،، أكيد ما تفرق معاه كلمني ولا لا !!
أنزين انت كلفت نفسك قبل لا تعاتبه تسأله : وين كنت ؟ فيك شيء ؟ مالك حس فقدتك ؟
ما خلقتله أعذار ؟ يمكن تعبان / زعلان ،، سيده حكمت عليه ؟ و لا قالك احتمال تقوله انت جذاب ؟؟
" في شغلات في القلب ، مستحيل تطلع ، شيء عشته اعتبرته شيء خيال ، فكرت انه مستحيل يصدقه غيري ،، احتفظ فيه لنفسي ،، و اطلعلي عذر يديد ،، ممكن أجذب عليك و أقولك أنا تعبان ،، و ( أنا مكسور ) ~ ،، مريض و ( أنا مالي خلق أمسك الفون لأن الدنيا صاكه فيني ) ،،

مثل :
إنسان تدري انه فيه ألف عله ( ألف مرض ) ،،،
تفقده يوم ،، يقولك انه تعبان ،، تقوله روح المستشفه ،، يقولك إنشالله
و أهو ما يلقى من يؤديه ،، من يهتم ،، و يقولك رحت و عطاني الدواء الفلاني و الفلاني و أهو بالأساس بفراشه يعذبه الألم ،، لكن شنقول ؟
بيقولولك الناس ما راح ،، بتقول هذا جذاب و جذب علي !!
تعرف انت ظروفه ؟ قالك رحت غسان ما تحاتيه ،، أهو فعلا جذب ، بس شوف نيته ؟
حرام تظلمة إذا انت ما تعرف إلي هو يمر فيه !!

مثل :
رفيجه مقربه من رفيجتها ،،
ما تعودوا يخشون عن بعض ولا شيء ،،
و تنصدم من شغله صارت و ما قالتها لها رفيجتها ،، سمعت من الناس
و تقول بكل بساطة " خشت عني شيء مهم ،، أذكر سألتها و قالت مأكو شيء ،، "
سيده تهزين ثقتج فيها ؟ أنزين يمكن أهي ما قالتلج غسان ما تجرحج ،، عشان ما تضايقج !! سمعتي من الناس و ظلمتيها ،،
تسمعين من الناس ماضيها و تكشين منها !! أنزين الإنسان يبدي صفحة يديده و يكمل عليها ،، ليش نحاشبه على ماضي ما كنا موجودين فيه ؟
ما كنا نعرف ظروفه في الماضي ،، تغير لما عرفنا ؟ خلاص ننسى إلي فات ،، لا نذكره و نحاسبه ؟ " هذا شيء مو من حقنا " ،، لأنه ماضي ،،

عقدة ذنب ..
وأيد ناس شالوها في قلوبهم لما حسو انهم ظلموا و كسروا ،،
لما أعادوا التفكير بعد فوات الأوان !!
مو سهله الواحد يحس بالذنب و تأنيب الضمير !!
ليش نظلم ؟ ليش نتسرع ؟ ليش نحكم بدون ما نفهم ؟
في التأني السلامه و في العجله الندامه ،،
أعيدو حساباتكم و شوفوا إلي لكم و إلي عليكم

"جميع العلاقات تصاب بفترة ملل هذا لا يعنى نهاية العلاقة بل هذا يعتبر من أبسط اختبارات العلاقات لنعرف من يوفي ومن يتفهم ومن يتحمل ومن يرحل! "

By;Dani